Statisti

Ég mætti galvaskur kl 7:45, korteri of seint á tökustað. Þróttaraheimilið. Við mér tók enginn eins og ég átti von á. Allir bara voða kúl, hip og happening. Þarna voru Sindri,bróðir Sigurjóns Kjartans, Egill Óla, Hansa, Víkingur og fleiri kunnugleg andlit.

Ég var instantlí gerður að réttarritara. Þetta var sem sagt önnur sería af þáttunum Réttur. Þættir 3 og 5 sem þarna var verið að taka upp. Réttar senurnar það er.

Þetta var inní dómsalnum og ég sit við hlið dómarans eins og sannur réttarritari. Fyrstu þrjár senurnar var þetta svona. Frá 8 til 12:30. Svo frá 13:30 til 18 var ég karakter útí sal sem var minna spennandi.

Það virtust allir vera mjög uppteknir við að vera voða svalir og ég sá strax að ég myndi ekki fá mikla leiðsögn. Þannig að ég tæklaði vandann bara strax með því að vinda mér upp að Sindra, sem er aðstoðarleikstjóri, og lét hann segja mér aðeins um hvað málið snérist.

Ég átti sem sagt bara að vélrita það sem fram fór. Ok. Ég gerði það. Bara of vel því eftir nokkrar tökur sagði Sindri mér að ég hreyfði mig umfram það sem þeir vildu. Hey! ég var bara í karakter. Svona eru hreyfingar ritara! Eftirleiðis ,,air" vélritaði ég ekki neitt, heldur sat bara í stellingunni.

Eftir um klukkustund vatt Sindri sér aftur að mér og sagði mér bara að horfa á skjáinn og ekkert vera að horfa á hina leikarana, eins og greinilega ég hafði gert of mikið af.

Sem sagt. Þarna sat ég, hreyfingalaus, og einblíndi á skjáinn af eldmóð í marga klukkutíma.

Êg hafði nú samt mjög gaman af þessu. Svo borga þeir mér líka eitthvað fyrir þetta.

Eftir hádegi kom Magnús aðalleikari, Kristján Franklín og einhverjir fleiri sem ég kann ekki að nefna.

Allt í allt, mjög skemmtileg reynsla og ekki eitthvað sem ég hefði viljað sleppa.