Sagan af brúðkaupinu

Fórum í brúðkaup í gær. Falleg athöfn. Langt síðan ég hef farið í kirkju. Var búinn að gleyma hve prestarnir eru dramatískir og barnalegir.

Þessi gæji reyndi að vera með dramatískar þagnir og slíkt til að leggja áherslu á barnaleg orð um kærleikann. Manni finnst alltaf eins og prestar séu að tala við börn. Jú, enda kallar hann þetta fólk, sóknarbörn. Börn guðs.

Of mikill drami fyrir minn smekk.

Svo var farið í Þróttaraheimilið í veislu. Góður matur og góð kaka. Gæsavídeóið sem Beta klippti vakti lukku og allir í stuði.

Beta fékk sér aðeins í tánna en ég bara eitt Bailey´s glas með kökunni. Enda má ég ekki við því að þynna blóðið meira en það er.

Beta var orðin góð á því og þegar kom að því að grípa vöndinn þá í fyrstu stóð mín til hliðar en á lokasekúndunni fylgdist ég skelkaður með er hún skaust fremst fyrir miðju og tók sér stöðu. Stöðu sem ég vil kalla Hidden dragon, crouching tiger stöðuna. Hún var tilbúin og virtist nánast blóðþyrst miðað við hinar ógiftu konurnar.

Vendinum var kastað og upphófst þá atburðarás sem best er að ímynda sér í slow motion. Beta, sem enn var í Hidden dragon, crouching tiger stöðunni, stökk þá upp með miklum offorsa. Á þessum tímapunkti var ljóst að þetta var bara orðið á milli Betu og einnar konu sem einnig stökk upp.

Önnur hvor þeirra þreifaði í vöndinn sem datt þá í gólfið, beint fyrir framan þær.

Þær tvær tóku dýfu niður á gólf á meðan allir aðrir stóðu á öndinni. Það vill til að Beta er lítil og þ.a.l. stutt í gólfið. En það hefði samt ekki breytt neinu skal ég segja ykkur. Því, í slow motion, sáust þessir tvær konur hætta lífi sínu og limum er þær stungu sér eftir þessum blessaða vendi.

Ég var hættur að sjá hvað var á seyði og stóð upp af stólnum. Það heyrðist eitthvað þrask og læti og eftir uþb tveggja sekúndna þögn reis ein konan upp úr krafsinu eins og Fönix upp úr eldinum.

Beta, nánast blóðug, reis upp sigri hrósandi, með vöndinn í öruggu dauðagripi í vinstri lófanum!

Ég gróf andlitið í hendurnar á mér með þá vitneskju um að núna væri komin pressa á giftingu inna árs!

Beta varð svo ánægð. Ég samgladdist henni, bölvandi guðunum, og drekkti mér í Bailey´s glasið mitt.

Svo var dansað. Hef bara eitt um það að segja. Ef Michael Flatley og Tasmaníudjöfullinn eignuðust barn, þá væri það Beta. Hún er stórkostleg á gólfinu. Sannkölluð Lord of the dance. Á meðan dansaði ég hógværan dans með tappann í löppinni, hugsandi um þau góðu ráð sem Will Smith gaf Kevin James í myndinni Hitch.

Góður dagur í gær. Réttir plús brúðkaup. Frá 7 um morgun til 1 um nótt.

-------disclaimer: Engar Betur voru skaðaðar við gerð þessarar sögu-------