Réttir

Fórum í réttir í morgun. Það var snilld. Hef ekki farið síðan ég var lítill strákur í sveit í Svartárdal.

Ég var í gallabuxum, rarik skóm og ullarpeysu. Ég féll inn í hópinn eins og flís við rass.

Ég hafði ekki dregið kind í örugglega hartnær 20 ár eða svo þannig að ég tók eitt fórnarlamb(bada bing) og setti hana á milli lappana og dró stefnulaust í hringnum. Vissi ekkert hvert hún átti að fara þannig að ég sleppti henni bara á endanum. En, ég dró þó kind.

Beta tók myndir.

Vorum mætt kl 9 og kindurnar voru komnar í dilkana sína kl 10:30. Þá hófst söngurinn. Bóndarnir(bara bóndar segja bændur) búnir að staupa sig soldið og orðnir hressir. Þeir mynduðu stóran hring inn í réttinni og sungu. Raddað, keðjusöng, u name it. Algjör snilld.

Maður fylltist stollti og þjóðarkennd þar sem maður stóð og horfði á þetta. Þetta er alvöru. Íslenskara verður þetta ekki.

Hálf klökk, yfirgáfum ég og Beta hringinn og fengum okkur kaffi aftan úr pikköpp jeppa þar sem fólkið sem ekki söng safnaðist saman. Þar voru rifjaðar upp sögur og greinilegt að partíið var rétt nýbyrjað hjá þessu fólki.

Við þurftum að drífa okkur heim því við erum á leiðinni í brúðkaup. Það eru öfgarnar í hina áttina.

Missum af réttarballinu þar sem stór hljómsveitin ,,allra veðra von" mun leika fyrir dansi.